ශ්රී ලංකාවේ දෛනික ජන ජීවිතය කිසිදු බාධාවකින් තොරව පවත්වාගෙන යාම සහ මහජන ආරක්ෂාව තහවුරු කිරීම වෙනුවෙන් දිවයිනේ ප්රධාන ක්ෂේත්ර 15ක් අත්යවශ්ය සේවා බවට පත් කරමින් ජනාධිපති අනුර කුමාර දිසානායක මහතාගේ නියෝගය පරිදි අති විශේෂ ගැසට් නිවේදනයක් නිකුත් කර තිබේ.
ජනාධිපති ලේකම් ආචාර්ය එන්.එස් කුමානායක මහතාගේ අත්සනින් යුතුව මෙම විශේෂ ගැසට් නිවේදනය ප්රකාශයට පත් කර ඇත. මීට පෙර ක්රියාත්මක වූ අත්යවශ්ය සේවා නියෝගයන් තවදුරටත් දීර්ඝ කරමින් මෙම පියවර ගෙන ඇති බව වාර්තා වේ.
ඒ අනුව, මහජනතාවට අත්යවශ්ය වන පහත සඳහන් සේවා සැපයීම හෝ බෙදාහැරීම සහ ඊට අදාළ සියලුම වැඩකටයුතු බාධාවකින් තොරව පවත්වාගෙන යාම අනිවාර්ය වේ.
ගැසට් නිවේදනය මඟින් ප්රකාශයට පත් කළ අත්යවශ්ය ක්ෂේත්ර 15 මෙන්න:
විදුලි බලය: විදුලි බල සැපයීම සම්බන්ධ සියලුම සේවාවන්.
ඉන්ධන සහ ගෑස්: ඛනිජ තෙල් නිෂ්පාදන සහ ගෑස් ඇතුළු සියලුම ඉන්ධන සැපයීම හෝ බෙදාහැරීම.
සෞඛ්ය සේවා: රෝහල්, සාත්තු නිවාස සහ බෙහෙත් ශාලාවල රෝගී ප්රතිකාර, රැකවරණය, පෝෂණය සහ නඩත්තු කටයුතු.
පොදු ප්රවාහනය: මගීන් හෝ බඩු බාහිරාදිය ප්රවාහනය සඳහා වූ පොදු ගමනාගමන සේවා.
ප්රවාහන යටිතල පහසුකම්: මංමාවත්, පාලම්, බෝක්කු, ගුවන් තොටුපළවල්, වරාය සහ දුම්රිය මාර්ග ඇතුළු ගමනාගමන හා සංචාරක සේවා පවත්වාගෙන යාම.
ජල සම්පාදනය: ජලය සැපයීම සහ ජලාපවහනය සම්බන්ධ සේවාවන්.
ආහාර ද්රව්ය: ආහාර සහ අත්යවශ්ය ද්රව්ය සැපයීම, ආරක්ෂා කිරීම මෙන්ම බෙදාහැරීම.
රාජ්ය නිලධාරීන්ගේ සේවා: දිස්ත්රික් ලේකම් කාර්යාල, ප්රාදේශීය ලේකම් කාර්යාල, ග්රාම නිලධාරීන්, සමෘද්ධි නිලධාරීන්, කෘෂි පර්යේෂණ සහකාරවරුන් ඇතුළු ක්ෂේත්ර මට්ටමේ නිලධාරීන්ගේ සියලුම සේවාවන්.
ගිලන් රථ සේවා: සියලුම හදිසි ගිලන් රථ සේවාවන්.
මූල්ය සහ බැංකු සේවා: ශ්රී ලංකා මහ බැංකුව ඇතුළුව සියලුම රාජ්ය බැංකු සහ රක්ෂණ සේවා කටයුතු.
පළාත් පාලන සේවා: පළාත් පාලන ආයතන මඟින් සිදු කරනු ලබන කසළ ශෝධනය, කුණු ඉවත් කිරීම, ගිනි නිවීම් ඇතුළු සියලුම පොදු සේවාවන්.
වාරිමාර්ග: වාරිමාර්ග ක්ෂේත්රයට සම්බන්ධ සියලුම සේවාවන්.
සන්නිවේදනය සහ මාධ්ය: දුරකථන, විදුලි සංදේශ, රජයේ මුද්රණාලය ඇතුළු රාජ්ය මාධ්ය සම්බන්ධ සියලුම සේවාවන්.
ඉඩම් සංවර්ධනය: පහත් බිම් ගොඩ කිරීම සහ සංවර්ධනය කිරීමේ සේවාවන්.
කෘෂිකර්මාන්තය: කෘෂිකාර්මික කටයුතු සහ කෘෂි රක්ෂණ සේවාවන්.
මෙම සේවාවන් රටේ ජන ජීවිතය සාමාන්ය පරිදි පවත්වාගෙන යාමට අතිශයින්ම තීරණාත්මක වන බැවින්, ඒවායේ අඛණ්ඩ පැවැත්ම සහතික කිරීම සඳහා රජය මෙම තීරණය ගෙන ඇත. මීට අමතරව, දිවයිනේ සියලුම දිස්ත්රික්කවල මහජන සාමය පවත්වාගෙන යාම සඳහා සන්නද්ධ හමුදා සාමාජිකයින් අනුයුක්ත කිරීමේ රෙගුලාසි ද යළි දීර්ඝ කර ඇති බව වාර්තා වේ.